Il Giorgialino

 Intra na casuzza du centru paisi, staviva ccu ma patri Vicenzu, omunu di picca paroli, assai travagliu e amuri ppa famiglia, nzumma come dicia u proverbiu: “vrazza longhi e lingua curta”; a ma mamma, Ngilineddra, fimmina beddra di facci e di cori, amurusa, ppi iddra figli e maritu erunu u specciu di l’arma sua; poi i mo frati: Ngiuluzzu u ranni, tuttu o ma patri; Carmelu, ci piaciva studiari e aviva beddri pinseri che ci passavunu ppa testa; ppi finiri ia, Maria, a nicaredda, che inciu a pignata, u sbriu da famiglia e da vaneddra. Tutti mi vulivunu beni, mi dicivunu che era u suli mpirsuna puri quannu c’era malattempu. Facennu i cunta ni sta casuzza erumu cincu pirsuni, strittulidri ma ccu tantu amuri. Puru a strata unnera nne cca e nne ddra, nzumma… ma u mari vicinu ccu dr’acqua cristallina e ddru sciauru che trasiva da finestra. Casa nicareddra, ppi cincu pirsuni, ma ppi nattri era na reggia. Purtroppu, iornu dopu iornu i cosi cangiarunu, u travagliu scarsiava e un si putiva iri...